Кеше китә ерҙән.

Кеше китә ерҙән.
Үҙе менән
Алып китә хыял донъяһын.
Әйтелмәгән һүҙҙәр, үкенестәр,
Ташып торған хистәр даръяһын.

Тик тереләр бик тиҙ онота алмаҫ
Бергә үткән ғүмер йылдарын.
Кемдер иҫләр моңһоу йылмайыуын,
Йә һағыныр берәү йырҙарын.

Дуҫтарында ҡалыр хәтирәләр,
Һөйгәнендә – йөрәк яраһы.
Ул киткәс тә, бәлки, тынғы бирмәҫ
Ҡай берәүгә ғәҙел язаһы.

Ә хистәре, хыял, өмөттәре
Юғаламы ни һуң яҙлығып?!
Улар ҙа бит һәр яҙ ергә ҡайта
Үлән булып, сәскә, наҙ булып.

Кеше китә ерҙән.
Йырҙан китә.
Иҫтәлеккә унан моң ҡала.
Ул йәшәүен шулай дауам итә
Хәтер тигән сикһеҙ донъяла.

Зөһрә Ҡотлогилдина.