“СӘЛӘМӘТЛЕК КӨНӨ”

Белеүегеҙсә, әлеге ваҡытта Иҫке Сибай ауылы «Айыҡ ауыл» конкурсының республика этабында ҡатнаша. Ойоштороу комитетының, халыҡтың тырышлығы менән бик күп төрлө әһәмиәтле саралар үткәрелеп килә.
Шәмбе көнө үткән “Һаулыҡ көнө” тип аталған йөкмәткеле сара республика «Айыҡ ауыл» конкурсында ҡатнашыу сиктәрендә ойошторолдо.
Сәләмәтлек әйтергә бик ябай ғына төшөнсә. Ә тормош өсөн иң аҫыл ҡиммәттәрҙең береһе. Ул һәр кемгә һауа, һыу, яҡтылыҡ кеүек кәрәк. Халыҡ «Һаулығың—байлығың» тип юҡҡа ғына әйтмәгән.
Сәләмәт йәшәү яҡлы булып, спорт менән шѳғѳлләнгәндә, шулай уҡ дѳрѳҫ туҡланғанда һаулығыңа зарланырға урын ҡалмай. Шул уҡ ваҡытта, ваҡытында табибтарға күренеү, уларҙың кәңәштәренә ҡолаҡ һалыу зарур. Тап ошо маҡсат менән килгән дә инде районыбыҙҙың табибтары.
Был көндө ауыл халҡы дауахана амбулаторияһында Баймаҡтан килгән һәм үҙебеҙҙең табиптарға күренеп, һаулыҡтарын тикшертә алды һәм флюорография, башҡа функциональ диагностика үтте.
Сибай медицина колледжының директоры Лилиә Шәрифйән ҡыҙы Ғилмуллина етәкселендәге ирекмәндәр отряды өлкән класс балалары осон профориентация, йәштәребеҙгә айыҡлыҡ темаһына лекциялар уҡыны, тәүге медицина ярҙамы күрһәтеү буйынса оҫталыҡ дәрестәре үткәрҙе.
Ошо уҡ ваҡытта сәхнәлә йөкмәткеле, эшлекле осрашыу үтте. Һөйләшеүҙә Баймаҡ ҡалаһы һәм районының Рәсәй Пенсия фонды идаралығы етәксеһе Баязитов Кәрим Миңлеғәле улы, үҙәк ҡала дауаханаһының табибы, нарколог Ҡашҡаров Азамат Хөрмәт улы, Баймаҡ район ғаилә үҙәгенең етәксеһе һәм социаль һорауҙар буйынса белгес Ҡарасурина Зилә Алмаз ҡыҙы, Республика Йәштәр психологик (ярҙам) үҙәгенең көньяҡ филиалы етәксеһе Мукаева Эльвира Ирик ҡыҙы, район йәштәр үҙәге етәксеһе Сирғәлина Гөлсинә Фирғәт ҡыҙы һәм район Урал арьяғы район-ара халыҡты эш менән тәьмин итеу үҙәге белгесе ҡатнашты.
Халыҡтың һорауҙарына табибтар, социаль өлкәләге белгестәр тулы яуаптар бирҙе. Бының өсөн алдан фаела һорауҙарға маҡсус ҡумта ҡуйылған ине.
Сәләмәтлек байрамына мәртәбә өҫтәп Өфө ҡалаһынан абруйлы ҡунаҡтар Бөтә донья башҡорттары ҡоролтайы президиумы ағзаһы, медецина фәндәре докторы Мырҙабаева Сәлиә Шәрифйән ҡыҙы, Башҡортостан Республикаһының Башлығы кәңәшсеһе, Бөтә донья башҡорттары ҡоролтайының Башҡарма комитеты рәйесе урынбаҫары Хәмитов Рәсих Әғзәм улы, Баймаҡ районы муниципаль район хакимиәте башлығы Фәнис Ғәбдрәшит улы Әминев, районыбыҙ башҡорттары Ҡоролтайы башҡарма комитеты рәйесе Ришат Вәкил улы Ишембәтов һәм район ҡатын-ҡыҙҙары советы етәксеһе Гөлшат Рим ҡыҙы Байдәүләтова килде.
Ҡунаҡтар ауылыбыҙ буйлап экскурсиянан һуң халыҡ менән осрашыуға ҡушылды. Дәүләт думаһы депутаты Сәлиә Шәрифйән ҡыҙы Мырҙабаев сығыш яһап, күп һанлы һорауҙарға яуап бирҙе.
Сара Әһлей Сөләймәнов исемендәге балалар сәнғәт мәктәбе тәрбиәләнеүселәре һәм уҡытыусылары тарафынан әҙерләнгән сағыу сығыштар менән ишелеп барҙы.
Спорт залында һәм боҙ майҙансығында спорт секциялары эшләне, хоккей буйынса ярыштар ойошторолдо.
Ауылыбыҙҙа һаулыҡты нығытыу, һаҡлау буйынса сәләмәт тормошҡа әйҙәүсе бик матур саралар үткәрелә һәм артабан да үткәреләсәк. Үҙ сәләмәтлегебеҙ – үҙебеҙҙең ҡулда. Ошондай матур осрашыуҙар күберәк булыуын теләп. Ауылыбыҙҙың спортсылары, һау-сәләмәт кешеләре күбәйер һәм улар һәр ваҡытта алғы сафта, яңынан-яңы үрҙәр яулар, тигән ышаныста ҡалабыҙ.